Årsmøte i Studieforbundet: fellesskap, fag og viktige samtalar

Korleis held vi oppe engasjement, deltaking og læring i ei tid med nye forventningar til frivilligheita? Det var eitt av spørsmåla som låg som bakteppe då Studieforbundet samla medlemsorganisasjonane til årsmøte på Håndverkeren i Oslo. Her vart formelle vedtak kombinert med faglege innlegg, gode diskusjonar, og, ikkje minst, premiere på ny inkluderingsfilm.

Frå årsmelding til framtidsblikk

Årsmøtet vart opna av styreleiar Magni Hjertenes Flyum, med tilbakeblikk på året som har gått og tankar om vegen vidare. Dei faste årsmøtesakene stod sentralt: årsmelding, rekneskap og budsjett vart behandla og vedtekne.

Fire medlemsorganisasjonar presenterte seg for resten av forsamlinga: Norsk Forening for Fartøyvern, Norske historiske spel, Norges Husflidslag og Norges Bygdekvinnelag. Presentasjonane synte i praksis den store breidda i Studieforbundet.

https://www.youtube.com/watch?v=mR603CGhnTE

Dagen baud òg på filmpremiere: «Åpent for alle», Studieforbundet sin nye inkluderingsfilm.

Aktiv deltaking og nye perspektiv

Gjennom gruppeaktivitetar fekk deltakarane arbeide med aktuelle tema. Human-Etisk Forbund løfta fram rolla frivillig sektor spelar i totalforsvaret, medan Frivillighet Norge tok opp korleis ein kan arbeide konkret med mangfald og inkludering i kurs.

Deltakarane deltok i gruppearbeid med fokus på inkludering og samfunnsrolle.

Folkeopplysning i ei uroleg tid

Generalsekretær i Voksenopplæringsforbundet, Stian Juell, løfta fram kjernen i arbeidet: – Menneske som møtest for å lære saman, skaper både kompetanse og tilhøyrsle.

Han peika òg på utfordringane framover, og behovet for å stå samla: – I tida som kjem må vi vere merksame og delta i diskusjonane. Ikkje alt som tel, kan teljast i eit rekneark.

Innlegg frå organisasjonar og samarbeidspartnarar sette vidare fokus på demokrati, deltaking og kunnskap som motkraft i ei tid med auka polarisering og desinformasjon.

Tradisjonar må brukast for å leve

Stortingsrepresentant Haagen Poppe (H) understreka betydninga av arbeidet i frivillig sektor og løfta fram kultur, tradisjonar og frivillig innsats som berebjelkar i samfunnet: – Tradisjonar toler ikkje å bli sett på pause. Dei må brukast for å bevarast.

Årsmøtet fekk òg helsingar frå mellom anna Kulturalliansen, som løfta fram arbeidet for betre tilgang til kulturaktivitetar og kurs for alle aldersgrupper.

Nye og attvalde krefter

Årsmøtet valde eit styre som kombinerer kontinuitet med nye impulsar. Magni Hjertenes Flyum held fram som leiar, medan Agathe Askeland Lauvdal kjem inn som ny nestleiar.

Styret etter årsmøtet:

• Leiar: Magni Hjertenes Flyum, Noregs Ungdomslag

• Nestleiar: Agathe Askeland Lauvdal, Norges Husflidslag

• Styremedlemmar:

  Hege Winje, Human-Etisk Forbund

  Elin Rise, Frilynt Norge

  Marit Mørtsell, Forbundet KYSTEN

  Einar Raastad, Forbundet for Norske Museumsvenner

  Signe Marie Kittelsaa, Folkeakademienes Landsforbund

• Varamedlemmar:

  Tommy Livsin, Vikinger i Vestfold og Telemark

  Margery Ann Sitkin, Knipleforeningen i Norge

  Juliane Husvik Sukkestad, Norske Historiske Spel

Solveig Torgersen Grinder vart takka av for innsatsen sin i styret gjennom mange år.

Nytt styre i Studieforbundet etter årsmøtet 2026. Frå venstre bak: Signe Marie Kittelsaa, Marit Mörtsell, Magni Hjertenes Flyum, Hege Winje, Ein Rise. Fremste rekke: Margery Ann Sitkin, Agathe Askeland Lauvdal, Juliane Husvik Sukkestad. Einar Raastad manglar på bildet.

Solveig Torgersen Grinder vart takka av etter svært solid innsats i styret gjennom mange år.

Eit sterkt fellesskap

Årsmøtet synte tydeleg krafta i fellesskapen i Studieforbundet. Medlemsorganisasjonane representerer både tradisjon, fornying og eit stort mangfald av aktivitetar – men felles er ønsket om å skape møteplassar for læring og deltaking.

Gjennom heile dagen gjekk det att: Det handlar om menneske som møtest – og som lærer saman.