Om Studieforbundet
kultur og tradisjon
Studieforbundet kultur og tradisjon er eit studieforbund for frivillige organisasjonar som jobbar med immateriell kulturarv. Organisasjonane driv opplæring innanfor handverksteknikkar, matkultur, samfunnskunnskap, dans, teater, kystkultur, lokalhistorie og demokrati.
Vi legg til rette for og styrkar opplæringa i medlemsorganisasjonane våre.
Studieforbundet får statstilskot frå Kultur- og likestillingsdepartementet, og har ansvar for utvikling, tilrettelegging og finansiering av eit mangfaldig opplæringstilbod i medlemsorganisasjonane og lokallaga våre. Studieforbundet og medlemsorganisasjonane samarbeider med ulike fagmiljø om ymse utviklingsprosjekt.
Kontoret sine opningstider i sommar: Måndag - fredag: 10.00 - 14.00.
I veke 29-31 ( 13. juli–2. august) er kontoret og telefonane stengde.
Opplæringa går føre seg på mange arenaer og i ulike former – frå eit lite, enkelt kurs, med aktiv deltaking både i eiga og andre si læring, til fordjuping i ulike emne, spesialisering i teknikkar og vegen til sveinebrev innanfor ulike handverksfag.
For studieforbundet er det viktig å sikre eit tilbod som dekkjer alle nivå og behov, og som er lett tilgjengeleg for deltakarar over heile landet. Studieforbundet har eit særleg ansvar for vegen til vidaregåande og høgare utdanning. Studieforbundet er medeigar i Handverksskolen på hjerleid som driv vidaregåande opplæring i tradisjonshandverksfag.
Opplæringa går føre seg i aktive læringsfellesskap, og er med på å skape sosialt trygge og trivelege rammer rundt læringssituasjonen.
Studieforbundet kultur og tradisjon har administrasjonen i Vågå. Årsmøtet er høgaste organet til Studieforbundet, og avgjer kva vedtekter som gjeld. Årsmøtet vel eit styre som er høgaste organ mellom årsmøta. Studieforbundet har og fylkesledd i alle fylker.
Frivillige organisasjonar som driv med kurs/opplæring innanfor folkekultur, kan bli medlem i Studieforbundet kultur og tradisjon.
Les meir om å søkje om å bli medlemsorganisasjon her:
Møt dei tilsette
Studieforbundet kultur og tradisjon har sidan 2001 hatt administrasjonen i Vågå i Innlandet. For tida er det seks tilsette på i underkant av fem årsverk. Kontoret held til i det gamle ysteriet i Vågå (Vågåvegen 35, 2680 Vågå) som husar fleire bedrifter tilslutta Vågå Næringshage.
Samarbeidsorganisasjonar
VOFO- Voksenopplæringsforbundet
Voksenopplæringsforbundet (VOFO) er studieforbundenes interesseorganisasjon. Hovedmålet deira er å styrke rammevilkåra for studieforbunda i arbeidet med å gi vaksne arena og tilgang til læring.
Les meir om VOFO på heimesida deira.
Dagleg leiar i Studieforbundet kultur og tradisjon, Kjærsti Gangsø, har tidlegare vore mangeårig styremedlem i Voksenopplæringsforbundet. Nå sit Solveg Torgersen Grinder frå Norges Husflidslag som representant for Studieforbundet i styret i VOFO.
FNV- Förbundet Nordisk Vuxenupplysning
FNV, Förbundet Nordisk Vuxenupplysning, er eit samarbeid mellom studieforbund frå fire av dei nordiske landa. FNV vart danna for å styrke den nordiske identiteten gjennom å fremme nordiske innslag i nasjonale, nordiske og internasjonale samarbeid. FNV vart danna i 1970 og består av sju studieforbund frå fire av dei nordiske landa.
FNV arbeider med utvikling og beslutningspåverknad mot politikarar og andre beslutningstakarar for eit levande nordisk samfunn og breddeopplæring som velferdsgode. Ei anna viktig oppgåve for FNV er samarbeid med andre nordiske vaksenopplæringsnettverk, organisasjonar og ulike etatar.
Les meir om FNV på heimesida deira.