Statsbudsjettet 2026 – både glede og striskjorte

Studieforbunda får 3,59% prisjustering, som forventa, men likevel gledeleg. Utover det, opplever vi overraskande kutt som vil kunne få store konsekvensar hjå medlemsorgansasjonar og paraplyorganisasjonar.

Stabilt statsbudsjett for studieforbunda i 2026

Regjeringa la onsdag 15. oktober fram sitt forslag til statsbudsjett for 2026. Tilskot til studieforbunda blir vidareført på om lag same nivå som i 2025, justert for lønns- og prisvekst, men inga ny satsing. Totalt blir det foreslått å sette av 272 millionar kroner til studieforbunda, fordelt mellom Kultur- og likestillingsdepartementet og Kunnskapsdepartementet.

Prisjustering for studieforbunda, striskjorte og havrelefse for andre

Studieforbunda får 3,59% prisjustering og isolert sett er vi svært tilfredse med det. Utover det, opplever vi overraskande kutt som vil kunne få store konsekvensar hjå medlemsorgansasjonar og paraplyorganisasjonar.

Paraplyane våre, Voksenopplæringsforbundet og Kulturalliansen, får ikkje tilskot i tråd med sine posisjonar, noko som kan svekke mellom anna rolla dei har som viktige talspersonar for studieforbunda. Vi er svært skuffa og ikkje minst overraska over det betydelege kuttet som er foreslått for Norges Husflidslag på 1,5 million. Dette kjem heilt utan varsel eller dialog. Om dette går gjennom, får det store konsekvensar for organisasjonen. 

Gledeleg for Noregs Ungdomslag

Gledeleg er det at Noregs Ungdomslag er flytta frå Kap. 325, post 78 Barne- og ungdomstiltak til Kap 315, Post 78 Frivillighetstiltak. Der er dei saman med Norsk Musikkråd og Frivillighet Norge , og opplever at Kulturdepartementet med dette grepet ser det arbeidet dei gjer utover barn og unge, kanskje spesielt med tanke på organisasjonsdrivne- og frivillig drivne kulturlokalar.

Eg er i det store og heile tilfreds. Likevel er det eit tema i Vofo korleis forskjellbehandlinga mellom dei to departementene held fram slik budsjettet er lagt fram. Det er ei framtidig krise. Dette må og skal harmoniserast på eit tidspunkt. Vi etterlyste og forventa dette ved budsjettarbeidet i fjor, og tykkjer framleis det er underleg at det ikkje blir gjort noko for å tette noko av gapet mellom heilt like organisasjonar som får så ulikt tilskot pr time, slik vi opplever det i Kultur- og likestillingsdepartementet samanlikna med Kunnskapsdepartementet. Så kom det heller ikkje ei justering i år, det er underleg, seier dagleg leiar i Studieforbundet kultur og tradisjon, Kjærsti Gangsø.

Evaluering av deling mellom departement

Evalueringa av delinga mellom dei to departementa skal vera fullført i løpet av 2025. Studieforbundet er utålmodige på dette. Resultatet av denne avgjerda, som vart gjennomført i beste meining frå og med 2021, har dessverre ført til ei aukande skeivfordeling mellom dei studieforbunda som høyrer til Kultur- og likestillingsdepartementet (som Studieforbundet kultur og tradisjon er ein del av) og dei som vart verande i Kunnskapsdepartementet. Den utgjer nå ca 40% pr kurstime i disfavør av studieforbund i Kulturdepartementet. Skeivfordelinga kjem av fleire faktorar, men det mest inngripande er at Direktoratet for høgare utdanning og kompetanse ikkje lenger kan justere tilskotsbeløpa mellom studieforbunda basert på faktisk studieaktivitet, sidan dei to pengesekkane ikkje kan vurderast samla. Evalueringa skal sluttførast i 2025, og vi hadde forventa at dette vart teke omsyn til for budsjettet 2026. 

Voksenoplæringsforbundet om Statsbudsjettet