Bunadopplæringa kan få 0,5 mill!

HURRA, HURRA! Det kan gå vegen for bunaden og bunadopplæring! I Senterpartiets alternative statsbudsjett presentert i dag, ligg det inne eit forslag om kr 500 000,- til Bunadopplæringa!

Leiarane i organisasjonane som står bak Bunadopplæringa bunadpynta og samla på ei fjøl under årets Fagdagane i bunad og folkedrakt på Lillehammer. Her saman med hovudforedraghaldar Laurann Gilbertson. F.v.: Magni Hjertenes Flyum, Noregs Ungdomslag, Kjærsti Gangsø, Studieforbundet kultur og tradisjon, Laurann Gilbertson, frå Vesterheim museum i USA, Hanne Yndestad Aadland, Norsk Folkedraktforum, Camilla Rossing, Norsk institutt for bunad og folkedrakt og Ellen Krageberg, Norges Husflidlag.

– Bunadane våre er både kulturarv, handverk og næring. Dei som lærer faget, fører vidare kunnskap som har halde seg levande i hundreår. At vi støttar fagopplæringa, er eit tydeleg signal om at handverk er ein del av kulturpolitikken, seier Senterpartiets kulturpolitiske talsperson Erling Sande.

Kulturarvløft i Senterpartiets alternative statsbudsjett.

Med alternativt statsbudsjett kjem ei pressemelding med tittelen Kulturarvløft i Senterpartiets alternative statsbudsjett. Her står:

"Partiet føreslår å samle heile kulturmiljøfeltet under Kulturdepartementet, og styrkje kulturarvsarbeidet i heile landet med vel 62 millionar kroner i nye midlar.

Flyttinga frå Klima- og miljødepartementet til Kulturdepartementet utgjer om lag 918 millionar kroner, og skal sikre betre samordning mellom musea, kulturminneforvaltninga, frivilligheita og kulturpolitikken. Samtidig kjem eit eige kulturarvløft på 62,3 millionar kroner til organisasjonar og institusjonar over heile landet – frå kystkultur og museumsdrift til immateriell kulturarv og tradisjonshandverk. Mellom dei som får auka støtte er Noregs einaste fagopplæring i bunadssaum i regi av frivilligheita sjølv.

Eit viktig element i satsinga er styrkt innsats for kystkulturen, med midlar til både fartøyvern, fartøyvernsentra og kystpilegrimsleia.

– Langs heile kysten finst det miljø som held sjøfart, fiske og kystkultur i hevd – ofte på dugnad og med små ressursar. Det handlar om meir enn båtar og bryggjer, det handlar om ei livsform som har bore landet. Senterpartiet vil at kystkulturen skal få den plassen den fortener i kulturpolitikken, seier Sande.

Med kulturarvløftet vil Senterpartiet styrkje grunnmuren i norsk kulturpolitikk – dei miljøa som tek vare på historia, språket og identiteten i heile landet."

Kva om bunaden kjem på Unesco-lista?

Det lurte vi på sommaren 2024. Under Arendalsuka i 2024 hadde vi i debatten Kva nå? Kva skjer om bunaden kjem på UNESCO-lista? ein brei, engasjert, humørfylt og veldig konstruktiv debatt. Vi snakka mellom anna om det kollektive ansvaret til kvar enkelt av oss allmenne bunadbrukarar, om staten si rolle etter ei innskriving, om tilhøvet og knivinga mellom trend og tradisjon, om skriket etter skuletilbod for saum og tekstil i alt for mange fylke, om opplæringsrolla til det frivillige feltet, om fellesskap og identitet, og kan Unesco i det heile tatt seie nei?

Unesco sa ikkje nei! Kan staten Noreg da seie nei?

– Det hjelp ikkje om nokon har lyst til å byrje å sy, om dei ikkje har moglegheit til å lære det, sa Barbro Tronhuus Storlien i debatten på Arendalsuka. Barbro gjorde oss merksame på dei store hola i utdanningstilbodet innanfor saum og tekstil. Berre 11 skular i Noreg har tradisjonell vg2 saum og tekstil, fire fylke manglar fullstendig tilbod om dette, og Innlandet fylke har kun eit privat tilbod.

Ein halv million til Bunadopplæringa er eit steg i riktig retning.

I panelet under Arendalsuka 2024 hadde vi med Unni Irmelin Kvam, debattleiar, Bunadpodden, Eivind Falk, direktør, Norsk håndverksinstitutt, Kornelia Minsaas, SoMe-kreatør og føredragshaldar, Barbro Tronhuus Storlien, Fru Storlien, bunadtilverkar, Norges Husflidslag og lærar på Bunadopplæringa, Åslaug Sem-Jacobsen, Senterpartiet og i 2024 repr. i Familie- og kulturkomiteen, Mette Vårdal, historikar, Kultivator, og Iver Flyum Bjørlo, politikar, Unge Venstre.